Paroles
Lastors
Escotatz totis brave monde, gents de
Cabaret et d’endacòm mai,
l’istòria vertadièra de quatre trobadors de
Carcassona partits per faire de musica
dins un endrech ont jamai degun aviá pas
poscut jogar…
Un endrech ont, ennaut de la montanha,
quatre castèls vos regardan…
Un endrech que totis los musicians…
Quand ne parlan…
Tremblan !
Lo primièr còp que soi vengut
Puta de Dieu ai pas agut
Lo temps de sortir la guitarra
Que me prenguèri una ramada
Estabosit e ragentat
Jos l’empont me soi amagat !
Lastors-ors
Avèm pas jogat a Lastors
Lo temps aicí es tròp chimbol
Avèm pas jogat a Lastors
I a pas de fèsta
Paura Jaumeta
Tornarem venir dins uèit jorns
Uèit jorns après quand sèm tornats
Totis quatre plan motivats
Dins lo cèl pas un cumulus
Sus lo temps i aviá consensus
Un lhauç tombèt d’un còp pecaire
E carbonizèt lo bataire !
Quin malur !
Lastors-ors
Podèm pas jogar a Lastors
Ara sèm que tres trobadors
Podèm pas jogar a Lastors
I a pas de fèsta
Paura Jaumeta
Tornarem venir dins uèit jorns
Lo tresen còp paures pichons
Un vent a escornar los buòus
Se levèt dins un roncament
A faire se trucar las dents
Una tornada a l’imprevista
Ven m’aspirar lo guitarrista !
Quin malur !
Lastors-ors
Podèm pas jogar a Lastors
Ara sèm que dos trobadors
Podèm pas jogar a Lastors
I a pas de fèsta
Paura Jaumeta
Tornarem venir dins uèit jorns
Se racontava dins lo vilatge e tota la region
que lo Simon de Montfòrt,
que comprenia pas res a la musica e al
fin’amor, aviá davalat de son Nòrd barbar
ambe sa banda de cuols benesits per jetar
una malediccion suls trobadors e totis los
intermitents e que , dempuèi aquel temps,
degun podiá pas jogar a Lastors quina musica
que siá e mai de musicas de salvatges
coma lo rap ou la tecnò !
Quand sèm tornats fasiá bel temps
Mas aquò durèt pas de temps
Lo sòl se metèt a tremblar
E tot lo cèl a negrejar
E crac ! Un trauc se dobriguèt !
Lo bassist i desapareguèt !
Lastors-ors
Avèm pas jogat a Lastors
Malediccion pels trobadors
Avèm pas jogat a Lastors
I a pas de fèsta
Paura Jaumeta
Mas ieu jogarai a Lastors !
Es pas acabada
Aquela crosada !
Som testut, tornarai tot sol !
Tot sol, tot sol
Tot sol, tot sol, tot sol !